ચૈતર વસાવાના લાફાકાંડનો વીડિયો વાયરલ થયા બાદ તેમની મુશ્કેલીઓ વધી
આમ આદમી પાર્ટીના ધારાસભ્ય ચૈતર વસાવાના લાફા કાંડના મામલામાં તેઓ વિરુદ્ધ ઝઘડિયા પોલીસ મથકે ફરિયાદ
રાજપીપલા, તા 29
આમ આદમી પાર્ટીના ધારાસભ્ય ચૈતર વસાવાના લાફાકાંડનો વીડિયો વાયરલ થયા બાદ તેમની મુશ્કેલીઓ વધી છે. પોલીસ દ્વારા ચૈતર વસાવા સામે ફરિયાદ નોંધવામાં આવી છે. જેમાં પીડિત પરિવાર દ્વારા ફરિયાદ નોંધાઈ છે.
ભરૂચના ઝઘડિયામાં આમ આદમી પાર્ટીના ધારાસભ્ય ચૈતર વસાવાના લાફા કાંડના મામલામાં તેઓ વિરુદ્ધ ઝઘડિયા પોલીસ મથકે ફરિયાદ નોંધાતા ખળભળાટ મચી જવા પામ્યો છે
ભરૂચ જિલ્લામાં આપના ધારાસભ્ય ચૈતર વસાવાનો વધુ એક વિવાદ સામે આવ્યો હતો. જેમાં તેમણે એક વ્યક્તિને લાફો માર્યો હતો. આ આખી ઘટનાનો વીડિયો પણ સોશિયલ મીડિયામાં વાયરલ થયો હતો. જેમાં ચૈતર વસાવાએ પહેલા હાથ ઉપાડ્યો હતો તેવું સ્પષ્ટ દેખાતું હતું. જોકે આ મામલે હવે પોલીસ એક્શન મોડમાં આવી ગઈ છે. સમગ્ર મામલે ચૈતર વસાવાની સામે ઝઘડિયા પોલીસ દ્વારા ફરિયાદ નોંધીને કાયદેસરની કાર્યવાહી હાથ ધરવામાં આવી છે.
ભરૂચના ઝઘડિયા તાલુકામાં આવેલી મેટ્રોપોલીટન એક્સિમકેમ પ્રા.લી. માં 23 એપ્રિલે થયેલી આગની દુર્ઘટનમાં કુલ 14 કામદારો ઇજાગ્રસ્ત થયા હતા, જ્યારે 2 કામદારોના મોત નિપજ્યા હતા.આ દુર્ઘટના બાદ 27 એપ્રિલે ધારાસભ્ય ચૈતર વસાવા મરતક કામદારોના પરિવારજનોને યોગ્ય વળતર સહિતની માંગ સાથે કંપનીમાં પહોંચ્યા હતા.જ્યાં તેમની સાથે તણાવપૂર્ણ પરિસ્થિતિ સર્જાઈ હતી. સ્થળ પર હાજર લોકો અને ધારાસભ્ય વચ્ચે ઘર્ષણ સર્જાતાં મામલો વધુ ગરમાયો હતો.આ મામલે ઝઘડિયા પોલીસે ધારાસભ્ય વિરુદ્ધ બે અલગ અલગ ગુનાઓ નોંધ્યા હોવાનું જાણવા મળ્યું છે. જેમાં ટ્રેસપાસિંગ અને મારામારી જેવા ગુનાઓનો સમાવેશ થાય છે. ખાસ વાત એ છે કે ગૃહ મંત્રાલયની વેબસાઈટ પર આ બંને FIR “સેન્સિટિવ” કેટેગરીમાં રાખીને હાઈડ કરવામાં આવી છે.હાલ સુધી આ ફરિયાદોને લઈને પોલીસ તરફથી કોઈ સત્તાવાર નિવેદન આપવામાં આવ્યું નથી. બીજી તરફ ચૈતર વસાવા તરફથી પણ આ સમગ્ર ઘટનાને લઈને જાહેર પ્રતિક્રિયા સામે આવી નથી. અત્રે ઉલ્લેખનીય છે કે કંપનીમાં ધારાસભ્ય ચૈતર વસાવાએ મૃતકના સંબંધીને લાફો ઝીંકી દેતા ઉહાપોહ મચ્યો હતો અને આ સમગ્ર ઘટનાનો વિડીયો પણ વાયરલ થયો હતો ત્યારે હવે આ મામલામાં પોલીસ તપાસનો ધમધમાટ જોવા મળી રહ્યો છે.
તસવીર :દીપક જગતાપ, રાજપીપલા
