એચ. એ. કોલેજમાં એન. એસ. એસ. ડે નિમિત્તે
સ્વામી વિવેકાનંદ વિશે વક્તૃત્વ સ્પર્ધા યોજાઈ
ગુજરાત લૉ સોસાયટી સંચાલિત એચ. એ. કોલેજ ઓફ કોમર્સમાં આજરોજ એન. એસ. એસ. સ્થાપના દિવસનું સેલિબ્રેશન કરવામાં આવ્યું હતું. આ પ્રસંગે કોલેજના વિદ્યાર્થીઓ માટે “સ્વામી વિવેકાનંદ વિરલ વિરાટ વિભૂતિ” વિષય ઉપર વક્તૃત્વ સ્પર્ધાનું આયોજન કરવામાં આવ્યું હતું. આ સ્પર્ધામાં કોલેજના ૧૮ વિદ્યાર્થીઓએ ભાગ લીધો હતો. બધા જ સ્પર્ધકોએ અદ્દભુત વિચારો વ્યક્ત કર્યા હતા. આ કાર્યક્રમમાં કોલેજના પ્રિન્સીપાલ સંજય વકીલે કહ્યું હતું કે યુગદ્રષ્ટા સ્વામી વિવેકાનંદ આજના યુવાનો માટે પ્રેરણાદાયી તથા આદર્શ છે.
ખૂબ જ નાની વયમાં સમગ્ર ભારતનું ભ્રમણ તથા અમેરિકા, બ્રિટન અને યુરોપમાં ભારતીય જ્ઞાન પરંપરાનો પ્રચાર અને પ્રસાર કરી વેદાંત સોસાયટી, રામક્રીશ્ન મઠ તથા રામક્રીશ્ન મિશનની સ્થાપના કરી હતી. આ બધી જ સંસ્થાઓ સ્થાપવા પાછળનો હેતુ સમાજ સેવા, શિક્ષણનું મહત્વ તથા માનવતાનું કાર્ય હતો. તેઓએ તત્વજ્ઞાન, ઇતિહાસ, કલા, વિજ્ઞાન તથા સાહિત્યનો અભ્યાસ કર્યો હતો, ભારતના ધર્મગ્રંથો, વેદો, ઉપનિષદો, ભગવદ્ ગીતા, રામાયણ વગેરેનો ઊંડો અભ્યાસ કર્યો હતો. સ્વામી વિવેકાનંદ માનતા હતા કે કર્મયોગ, ભક્તિ યોગ, રાજયોગ અને જ્ઞાનયોગ અપનાવવાથી તંદુરસ્ત અને આદર્શ જીવન જીવી શકાય છે. આ કાર્યક્રમનું સંચાલન તથા આયોજન પ્રા. અલ્પા પાઘડલ તથા પ્રા. એચ. બી ચૌધરીએ કર્યું હતું. સમારંભનાં અંતે પ્રા. ચેતન મેવાડાએ આભારવિધિ કરી હતી. આ કાર્યક્રમમાં કોલેજના ઘણી મોટી સંખ્યામાં વિદ્યાર્થીઓ હાજર રહ્યા હતા.
