નર્મદા :
નર્મદાના કેળા ઓમાન, સાઉદી અરેબિયા, યુએઈ, ઇરાક, ઉઝબેકિસ્તાન, તુર્કી, સિરિયા, જોર્ડન, કતાર અને કુવૈત જેવા વિદેશમાં પહોંચ્યા
નર્મદા જિલ્લાના થરી ગામથી વૈશ્વિક બજાર સુધીનું સ્ટાર્ટઅપ “રેવા ફ્રેશ ફ્રુટ એક્સપોર્ટ”
થરી ગામના વિક્રમસિંહ રાઠોડની પ્રેરણા અને માર્ગદર્શનથી પુત્ર મયુરધ્વજસિંહ રાઠોડ દ્વારા ‘રેવા ફ્રેશ ફ્રુટ એક્સપોર્ટ’ ની સ્થાપના કરાઈ
જિલ્લાના 50થી વધુ ગામોના 500થી વધુ ખેડૂતોને જોડતું સફળ સ્ટાર્ટઅપ
ઓમાન, સાઉદી અરેબિયા, યુએઈ, ઇરાક, ઉઝબેકિસ્તાન, તુર્કી, સિરિયા, જોર્ડન, કતાર અને કુવૈત જેવા દેશોમાં કેળાની નિકાસ
ગુજરાત સરકારના હોર્ટિકલ્ચર વિભાગ તરફથી વર્ષ 2024-25 દરમિયાન રૂ. 2.15 કરોડની સબસિડીથી વિકાસને મળ્યો વેગ
રેવા ફ્રેશ ફ્રુટ એક્સપોર્ટને વર્ષ 2025-26માં 54,100 મેટ્રિક ટન સુધી પહોંચવામાં મળી સફળતા
રેવા ફ્રેશ ફ્રુટ એક્સપોર્ટના માલિકના પિતાશ્રી વિક્રમસિંહ રાઠોડ માટે સ્થાનિક ખેડૂતોનું સશક્તિકરણ સર્વોચ્ચ પ્રાથમિકતા
રાજપીપલા,તા2
નર્મદાના કેળા ઓમાન, સાઉદી અરેબિયા, યુએઈ, ઇરાક, ઉઝબેકિસ્તાન, તુર્કી, સિરિયા, જોર્ડન, કતાર અને કુવૈત જેવા વિદેશમાં પહોંચ્યા છે.
નર્મદા જિલ્લાના નાંદોદ તાલુકાના થરી ગામમાંથી એક સામાન્ય ખેડૂત તરીકે શરૂ થયેલી સફર આજે વૈશ્વિક સ્તરે કેળા નિકાસકાર તરીકે ઓળખ પ્રાપ્ત કરી છે. વિક્રમસિંહ રાઠોડની પ્રેરણા અને માર્ગદર્શનથી પુત્ર મયુરધ્વજસિંહ રાઠોડએ ‘રેવા ફ્રેશ ફ્રુટ એક્સપોર્ટ’ ની સ્થાપના કરી છે. આજે નર્મદા સહિત સમગ્ર ગુજરાતના યુવાનો માટે પ્રેરણાસ્ત્રોત બન્યા છે.
વર્ષ 2016માં સ્થાપિત આ સ્ટાર્ટઅપે શરૂઆતના દિવસોમાં અનેક પડકારોનો સામનો કર્યો હતો. પ્રારંભિક તબક્કામાં રાજપીપલા APMC મારફતે કેળાનું વેચાણ અને નિકાસ કરવામાં આવતી હતી. પરંતુ વિક્રમસિંહ રાઠોડે દૃઢ સંકલ્પ અને અવિરત મહેનતના બળે થરી ગામમાં આધુનિક સુવિધાઓ સાથે ફ્રેશ ફ્રુટ એક્સપોર્ટ યુનિટ સ્થાપી. આ પહેલથી સ્થાનિક ખેડૂતોને સીધો અને વધુ નફાકારક લાભ મળવા લાગ્યો છે.
આજે “રેવા ફ્રેશ ફ્રુટ એક્સપોર્ટ” નર્મદા જિલ્લાના 50થી વધુ ગામોના 500થી વધુ ખેડૂતોને જોડે છે. સાથે જ ભરૂચ અને છોટાઉદેપુર જિલ્લાના ખેડૂતોને પણ આવરી લે છે. વર્ષ દરમિયાન વિવિધ રાજ્યોમાંથી કેળાનું ઉત્પાદન મેળવી તેને આંતરરાષ્ટ્રીય બજારમાં પહોંચાડવામાં આવે છે. સિઝન વાઈસ જોઈએ તો માર્ચથી ઓગસ્ટ દરમિયાન ગુજરાત અને મધ્ય પ્રદેશ, ઓગસ્ટથી ડિસેમ્બર દરમિયાન મહારાષ્ટ્ર તેમજ ડિસેમ્બરથી માર્ચ દરમિયાન કર્ણાટક અને આંધ્ર પ્રદેશના કેળાને નિકાસ કરવામાં આવે છે.
આ સ્ટાર્ટઅપ દ્વારા ઓમાન, સાઉદી અરેબિયા, યુએઈ, ઇરાક, ઉઝબેકિસ્તાન, તુર્કી, સિરિયા, જોર્ડન, કતાર અને કુવૈત જેવા દેશોમાં કેળાની નિકાસ કરવામાં આવે છે. ખાસ કરીને G-9 કેવેન્ડિશ જાતના કેળા માટે આંતરરાષ્ટ્રીય બજારમાં ભારે માંગ છે.
ગુજરાત સરકારના હોર્ટિકલ્ચર વિભાગ તરફથી વર્ષ 2024-25 દરમિયાન રૂ. 2.15 કરોડની સબસિડી મળતા સ્ટાર્ટઅપને વધુ ગતિ મળી. જેના થકી વિક્રમસિંહ રાઠોડને રેવા ફ્રેશ ફ્રુટ એક્સપોર્ટમાં અનેક રીતે રાહત મળી છે. 5 એકર વિસ્તારમાં સ્થિત કોલ્ડ સ્ટોરેજ છે જેમાં કુલ 1700 મેટ્રિક ટન સંગ્રહ ક્ષમતા ઉપલબ્ધ છે. જેમાં જિલ્લાના તેમજ આસપાસના ખેડૂતો પાસેથી આશરે 1500 એકર વિસ્તારમાંથી કેળાની ખરીદી કરવામાં આવે છે.
વર્ષ 2016 થી શરૂ થયેલ “રેવા ફ્રેશ ફ્રુટ એક્સપોર્ટ વર્ષ 2016-17 માં 750 મેટ્રિક ટનથી શરૂઆત કરીને નિકાસમાં વર્ષદર વર્ષે નોંધપાત્ર વૃદ્ધિ નોંધાઈ રહી છે. વર્ષ 2022-23માં 6,085 મેટ્રિક ટન થયુ હતુ જે વર્ષ 2025-26માં 54,100 મેટ્રિક ટન સુધી પહોંચવામાં સફળતા મળી છે.
વિક્રમસિંહ રાઠોડે જણાવ્યું હતું કે, સૌ પ્રથમ પ્રાધાન્ય સ્થાનિક ખેડૂતોને આપવામાં આવ્યો છે જેમાં ૫૦૦ થી ખેડૂતો જોડાયા છે. અમારા માટે સ્થાનિક ખેડૂતોનું સશક્તિકરણ સર્વોચ્ચ પ્રાથમિકતા છે. જેનાથી ખેડૂતોને ઘર-આંગણે ફાયદો થાય છે. વધુમાં જણાવ્યુ કે, રેવા ફ્રેશ ફ્રુટ એક્સપોર્ટમાં ૨૫૦ થી વધુ સ્થાનિક લોકો કામ કરે છે.
રેવા ફ્રેશ ફ્રુટ એક્સપોર્ટના મેનેજર પીનાકીન પટેલે જણાવ્યું હતું કે, ખેડૂતોના ખેતરો સુધી જઈને કેળાનું ગ્રેડિંગ, સોર્ટિંગ અને પેકિંગ કરાવે છે, જેથી ગુણવત્તા જાળવી રાખીને સીધા આંતરરાષ્ટ્રીય બજારમાં નિકાસ કરવામાં આવે છે. વધુમાં જણાવ્યું કે, થરી ગામમાં યુનિટ સ્થાપિત થયા બાદ ખેડૂતોને સીધો લાભ મળ્યો છે અને તેમના ઉત્પાદનને વૈશ્વિક બજારમાં યોગ્ય કિંમત મળી રહી છે.
આમ, નાંદોદ તાલુકાના એક સામાન્ય ખેડૂતથી શરૂ થયેલી વિક્રમસિંહ રાઠોડની સફર આજે સફળ ઉદ્યોગપતિ તરીકે ઉભરી છે, જે વોકલ ફોર લોકલ થી લોકલ ટુ ગ્લોબલ સુધીની પ્રેરણાનું ઉત્તમ ઉદાહરણ છે.
રિપોર્ટ :દીપક જગતાપ, રાજપીપલા