ગાંધીનગર ખાતે લાયન્સ ઇન્ટરનેશનલ ડિસ્ટ્રિક્ટ 3232-83ની ત્રીજી વાર્ષિક ડિસ્ટ્રિક્ટ કોન્ફરન્સ અંતર્ગત એક અનોખી સાંસ્કૃતિક રજૂઆત યોજાઈ હતી. ‘કૃષ્ણમથી – ગીતાની સજીવ અભિવ્યક્તિ’ શીર્ષક હેઠળ આયોજિત આ પ્રસ્તુતિમાં જાણીતાં ક્લાસિકલ ડાન્સર બીના મહેતાએ પોતાનાં વિધાર્થીઓ સાથે નૃત્યપ્રસ્તુતિ કરી હતી. શ્રીમદ ભગવદ ગીતા પરથી પ્રેરિત આ નૃત્યપ્રસ્તુતિમાં ભગવાન કૃષ્ણની આધ્યાત્મિક યાત્રાને સુફી ક્લાસિકલ નૃત્ય દ્વારા અભિવ્યક્ત કરવામાં આવી હતી. કાર્યક્રમમાં ઉપસ્થિત દર્શકોને કલાત્મક અભિવ્યક્તિ અને આધ્યાત્મિકતા વચ્ચેનો સુંદર સમન્વય અનુભવવા મળ્યો. નારાયણી હાઇટ્સ ખાતે લાયન્સ ડિસ્ટ્રિક્ટ ગવર્નર હિરેન મેવાડાની અધ્યક્ષતામાં યોજાયેલા આ કાર્યક્રમને હાજર રહેલા મહેમાનો અને દર્શકો દ્વારા ઉત્તમ પ્રતિસાદ મળ્યો હતો.
