*સદ્ગુરુ શાસ્ત્રી શ્રી આનંદપ્રિયદાસજી સ્વામીની ૧૦૫મી પ્રાગટ્ય જયંતી નિમિત્તે કુમકુમ મંદિર દ્વારા દેશ-વિદેશના હરિભક્તો સામૂહિક સ્વામિનારાયણ મંત્ર જાપ કરશે.*
*શરદપૂનમે હીરાપુર કુમકુમ આનંદધામ ખાતે ભવ્ય ઉજવણી કરવામાં આવશે.*
અમદાવાદ:
કુમકુમ મંદિરના સંસ્થાપક, સાધુતાની મૂર્તિ સદ્ગુરુ શાસ્ત્રી શ્રી આનંદપ્રિયદાસજી સ્વામીની ૧૦૫મી પ્રાગટ્ય જયંતી આગામી તારીખ ૨૫/૧૦/૨૦૨૬, રવિવાર (શરદપૂર્ણિમા)ના રોજ આવી રહી છે. આ પાવન અવસરે પૂજ્ય સ્વામીજી પ્રત્યે કૃતજ્ઞતા વ્યક્ત કરવા તથા શ્રી સ્વામિનારાયણ ભગવાનની વિશેષ પ્રસન્નતા અર્થે દેશ-વિદેશમાં વસતા અસંખ્ય હરિભક્તો દ્વારા અનોખી રીતે ‘સ્વામિનારાયણ મંત્ર જાપ’ અભિયાનનો શુભારંભ કરવામાં આવ્યો છે.
આ આયોજન અંગે માહિતી આપતાં કુમકુમ મંદિરના મોટિવેશનલ સ્પીકર અને પ્રેરક વક્તા સાધુ પ્રેમવત્સલદાસજીએ જણાવ્યું હતું કે, સદ્ગુરુ સ્વામીજીના ચરણોમાં શ્રદ્ધાંજલિ અર્પણ કરવા માટે ગુજરાત સહિત ભારતભરમાં તેમજ લંડન, અમેરિકા, કેનેડા સહિત વિશ્વભરમાં વસતા સત્સંગીઓ રોજેરોજ નિયમિત માળા-જાપ કરી રહ્યા છે.
જેમાં વયમર્યાદા મુજબ સુંદર આયોજન ગોઠવાયું છે.
૬૦ વર્ષથી વધુ ઉંમર ધરાવતા ભક્તો નિત્ય ૨૫ માળા ફેરવશે, જેનાથી પ્રાગટ્ય જયંતી સુધીમાં તેઓ દ્વારા આશરે ૪૦,૫૦૦ મંત્ર જાપ પૂર્ણ થશે.
૬૦ વર્ષથી નીચેના યુવા ભક્તો સમયના સદુપયોગ સાથે દૈનિક ૧૦ માળા ફેરવશે, જેના થકી તેઓ ઉત્સવ સુધીમાં ૧૬,૨૦૦ મંત્ર જાપ સંપન્ન કરશે.
આ મહોત્સવની મુખ્ય ઉજવણી તારીખ ૨૫ ઓક્ટોબર ૨૦૨૬, રવિવારના રોજ સાંજે ૫:૩૦થી ૮:૩૦ દરમિયાન કુમકુમ આનંદધામ (હીરાપુર) ખાતે ભક્તિભાવપૂર્વક સંપન્ન થશે.
આ અવસરે સૌથી વધુ મંત્ર જાપ કરનારા ૩ પુરુષ અને ૩ મહિલા ભક્તોને સંસ્થા તરફથી પુરસ્કાર આપીને વિશેષ પ્રોત્સાહિત કરવામાં આવશે.
કુમકુમ મંદિરના મોટિવેશનલ સ્પીકર સાધુ પ્રેમવત્સલદાસજીએ મંત્ર જાપનો મહિમા વર્ણવતાં ઉમેર્યું હતું કે,
આજના ભાગદોડ અને તણાવભર્યા જીવનમાં મનની સ્થિરતા અને પરમ શાંતિ મેળવવાનો શ્રેષ્ઠતમ ઉપાય ‘સ્વામિનારાયણ’ મહામંત્રનો જાપ છે.
સ્વયં શ્રી સ્વામિનારાયણ ભગવાને વચન આપ્યું છે કે, જે કોઈ શ્રદ્ધાપૂર્વક આ સ્વામિનારાયણ મંત્રનો જાપ કરે છે તેના સર્વ પાપ બળીને ભસ્મ થઈ જાય છે. એટલું જ નહીં, મંત્ર જાપ કરનાર ભક્તનો જ્યારે અંતકાળ આવે છે ત્યારે સ્વયં પ્રગટ પ્રભુ તેને તેડવા પધારે છે અને અક્ષરધામના શાશ્વત સુખ-શાંતિ અર્પણ કરે છે.
