પ્રસિદ્ધ ફિલ્મ કલાકાર કાર્તિક આર્યને સ્ટેચ્યુ ઓફ યુનિટીની મુલાકાત લીધી
“એકતાના પ્રતીક વિશ્વની સૌથી ઊંચી પ્રતિમા જોઈને ગર્વ થાય છે; પ્રત્યેકે સ્ટેચ્યુ ઓફ યુનિટીની મુલાકાત લેવી જોઈએ” : કાર્તિક આર્યન
કાર્તિક આર્યને સ્ટેચ્યુ ઓફ યુનિટી ખાતે સરદાર પટેલને પુષ્પાંજલિ અર્પણ કરી
નર્મદા અને છોટાઉદેપુર જિલ્લાના પ્રખ્યાત નાની દેવરૂપણના હોળી અને રાઠવા આદિવાસી નૃત્યમાં સામેલ થઇ ગુજરાતની સમૃદ્ધ આદિવાસી સંસ્કૃતિને માણી.
રાજપીપલા, તા 21
સરદાર વલ્લભભાઈ પટેલના સાનિધ્યમાં એકતા નગર ખાતે આયોજિત 72મા રાષ્ટ્રીય ફિલ્મ પુરસ્કાર સમારોહમાં ભાગ લેવા પધારેલા પ્રસિદ્ધ ફિલ્મ કલાકાર શ્રી કાર્તિક આર્યને આજે નર્મદા જિલ્લાના એકતાનગર ખાતે આવેલી વિશ્વની સૌથી ઊંચી પ્રતિમા સ્ટેચ્યુ ઓફ યુનિટીની મુલાકાત લીધી હતી.
મુલાકાત દરમિયાન કાર્તિક આર્યને રાષ્ટ્રની એકતા અને અખંડિતતાના શિલ્પી સરદાર વલ્લભભાઈ પટેલની પ્રતિમાને પુષ્પાંજલિ અર્પણ કરી હતી. ત્યારબાદ તેમણે સ્ટેચ્યુ ઓફ યુનિટીની વ્યૂઇંગ ગેલેરીની મુલાકાત લઈ ત્યાંથી નર્મદા નદી, સાતપુડા અને વિંધ્યાચલની ગિરિમાળાઓ તેમજ સરદાર સરોવર નર્મદા ડેમના વિહંગમ દૃશ્યોનું નિરીક્ષણ કર્યું હતું.
આ દરમિયાન તેમણે સ્ટેચ્યુ ઓફ યુનિટી તથા એકતા નગર ખાતે વિકસાવવામાં આવેલા વિવિધ પ્રવાસન સ્થળો અને સુવિધાઓ અંગે પણ માહિતી મેળવી હતી. એકતા નગરમાં થયેલા આયોજનબદ્ધ પ્રવાસન વિકાસકાર્યો અંગે તેમને જરૂરી માહિતી આપવામાં આવી હતી.
સ્ટેચ્યુ ઓફ યુનિટીની મુલાકાત અંગે પોતાના પ્રતિભાવમાં કાર્તિક આર્યને જણાવ્યું હતું કે, “આજે વિશ્વની સૌથી ઊંચી પ્રતિમા સ્ટેચ્યુ ઓફ યુનિટીની પરિવાર સાથે મુલાકાત લીધી. એકતાના પ્રતિક સમાન વિશ્વની સૌથી ઊંચી પ્રતિમા જોઈને ગર્વ થાય છે. દરેક વ્યક્તિએ સ્ટેચ્યુ ઓફ યુનિટીની મુલાકાત લેવી જોઈએ.”
તેમણે વધુમાં જણાવ્યું હતું કે, “મારી ફિલ્મને પ્રથમ રાષ્ટ્રીય પુરસ્કાર મળ્યો છે, જે મારા માટે ગર્વની વાત છે.”
મુલાકાત દરમ્યાન સ્ટેચ્યુ ઓફ યુનિટી ઓથોરીટી દ્વારા ખાસ આયોજિત નર્મદા અને છોટાઉદેપુર જિલ્લાના પ્રખ્યાત નાની દેવરૂપણના હોળી અને રાઠવા નૃત્યમાં સહભાગી થઈને ગુજરાતની સમૃદ્ધ આદિવાસી સંસ્કૃતિને માણી હતી.
આ પ્રસંગે સ્ટેચ્યુ ઓફ યુનિટી વિસ્તાર વિકાસ અને પ્રવાસન નિયમન સત્તામંડળના મુખ્ય કારોબારી અધિકારી અમિત અરોરાએ કાર્તિક આર્યનને સ્મૃતિચિહ્ન તથા ફોટોગ્રાફ અર્પણ કરી તેમનું સન્માન કર્યું હતું
તસવીર :દીપક જગતાપ, રાજપીપલા
