નર્મદાથી એશિયા સુધી:
હોંગકોંગ, ચાઈના
ટ્રેમ્પોલીન જીમ્નાસ્ટિકમાં નર્મદાની આદિવાસી દીકરી
ફલક વસાવાની આંતર રાષ્ટ્રીય ક્ષેત્રે સફળ ઉડાન
હોંગકોંગ એશિયન ચેમ્પિયનશીપમાં ફ્લકે મેળવ્યું પાંચમું સ્થાન
હવે 2030 કોમન વેલ્થ. એંશીયન ગેમ્સમાં અને ઓલોમ્પિકમાં ભારતનું પ્રતિનિધિત્વ કરવાની ફલકની તૈયારી
એક જ પરિવારની અનોખી સિદ્ધિ : પિતા કોચ, માતા જજ અને દીકરી ચેમ્પિયન
ફલક વસાવાની સિદ્ધિએ ગુજરાત અને ભારતનું નામ આંતરરાષ્ટ્રીય મંચ પર ગૌરવભેર ઉજાગર કર્યું
ફલક વસાવાની સિદ્ધિ દેશની લાખો દીકરીઓ માટે પ્રેરણારૂપ બની
રાજપીપળા, તા 13
નર્મદા જિલ્લો એસ્પીરેશનલ ડિસ્ટ્રીક્ટ છે. આ આદિવાસી જિલ્લામાં નર્મદાની ધોરણ 10 માં અભ્યાસ કરતી આદિવાસી દીકરી ફલક વસાવાએ આંતરરાષ્ટ્રીય ક્ષેત્રે નર્મદાનું અને ગુજરાતનું નામ રોશન કર્યું છે.
તાજેતરમાં હોંગકોંગ, ચાઈના ખાતે યોજાયેલી બીજી ટ્રેમ્પોલીન જીમ્નાસ્ટિક એશિયન ચેમ્પિયનશીપમાં ફલકે જુનિયર એજ ગ્રુપની ઇન્ડિવિઝ્યુઅલ વુમન્સ કેટેગરીમાં ભાગ લઈને સમગ્ર એશિયામાં પાંચમું સ્થાન પ્રાપ્ત કરીને આંતરરાષ્ટ્રીય ક્ષેત્રે નર્મદાનું અને ગુજરાતનું નામ રોશન કર્યું છે
એક સામાન્ય આદિવાસી વિસ્તારની દીકરીએ પોતાના અસાધારણ સપનાઓને પાંખો આપી આજે સમગ્ર એશિયામાં ભારત અને ગુજરાતનું ગૌરવ વધાર્યું છે.
લેવલ-૩ જીમ્નાસ્ટિક ઈન્ટરનેશનલ કોચ. ડો.હિમાન્સુ ગૌરી શંકર દવેએ જણાવ્યું હતુ કે, કુ. ફલક વસાવાની સફળતા એક દિવસમાં મળી નથી. શરૂઆતમાં સાધનોનો અભાવ હતો, યોગ્ય તાલીમની અછત હતી અને અનેક પડકારો સામે ઊભા રહેવું પડતું હતું. પરંતુ ફલકે મુશ્કેલીઓને પોતાની શક્તિ બનાવી. સવાર-સાંજની કઠોર મહેનત, ભણતર સાથે સતત પ્રેક્ટિસ અને કંઈક મોટું કરવાની જિદ્દ તેને સતત આગળ ધપાવતી રહી.
ગુજરાતીમાં કહેવત છે કે મોરના ઈંડા ચિતરવા ના પડે, હા એક જ પરિવારની અનોખી સિદ્ધિ મેળવવાં માટે માતા પિતાનું મોટું યોગદાન છે પિતા ચન્દ્રકાન્ત વસાવા ડીસ્ટ્રીક કોચ છે અને માતા જજ અને મહિલા કોચ નું માર્ગદર્શન મળતા દીકરી ચેમ્પિયન બની.
માતા પિતાના જણાવ્યાં અનુસાર વર્ષ ૨૦૨૪માં એશિયન ચેમ્પિયનશીપમાં છઠ્ઠું સ્થાન મેળવનાર ફલકે વધારે મહેનત કરી, પરિણામે માત્ર બે વર્ષમાં તેણે પોતાનું પ્રદર્શન વધુ સુધારી એશિયામાં પાંચમું સ્થાન હાંસલ કર્યું. આ સિદ્ધિ એ વાતનો પુરાવો છે કે સફળતા સતત સુધારાની પ્રક્રિયાનું પરિણામ હોય છે.
ફલકની સફળતા પાછળ તેના પરિવારનું અસાધારણ યોગદાન પણ છે. તેના પિતા ચંદ્રકાન્ત વસાવા ડિસ્ટ્રિક્ટ જીમ્નાસ્ટિક કોચ તરીકે સેવા આપતા ચંદ્રકાન્તભાઈની કાબિલિયત જોઈને ‘જીમ્નાસ્ટિક ફેડરેશન ઓફ ઇન્ડિયા’ એ તેમને એશિયન ચેમ્પિયનશીપમાં ભારતીય ટીમના સત્તાવાર કોચ તરીકે નિયુક્ત થતા ભારતીય ટીમના કોચ તરીકે ફરજ બજાવી રહ્યા હતા, જ્યારે તેની શ્રીમતી મિકેતાબેન વસાવાએ સપ્ટેમ્બર ૨૦૨૫માં ટ્રેમ્પોલીન ઇન્ટરનેશનલ જજીંગ કોર્સની કપરી પરીક્ષા પાસ કરીને નવો રેકોર્ડ બનાવ્યો હતો. સમગ્ર ભારતમાંથી આ પરીક્ષા પાસ કરનાર તેઓ એકમાત્ર મહિલા બન્યા હતા. એશિયન ટુર્નામેન્ટમાં જીમ્નાસ્ટિક ફેડરેશન ઓફ ઇન્ડિયા તરફથી તેઓ ઇન્ટરનેશનલ જજ તરીકે હોંગકોંગ ગયા હતા. આ પરિવારની રમત પ્રત્યેની સમર્પણ ભાવના દરેક માટે પ્રેરણારૂપ છે.
કુ. ફલક વસાવાએ જણાવ્યું હતું કે, માતા-પિતા,અને આંતર રાષ્ટ્રીય કોચ કોચ ડો. હિમાંશુ દવે અને અન્ય માર્ગદર્શકોના સતત સહયોગથી જ તે આ મુકામ સુધી પહોંચી છે. હવે તેનું આગામી લક્ષ્ય ૨૦૩૦માં ભારતમાં યોજાનારી કોમનવેલ્થ ગેમ્સમાં દેશ માટે મેડલ જીતવાનું છે.અને ઓલોમ્પીક માં ભાગ લેવામાટે ફલક અને કોચ પુરી તૈયારી કરી રહ્યાં છે.
નર્મદાના ડુંગરાઓમાંથી ઉડાન ભરનારી આ દીકરી ફલક વસાવા માત્ર એક ખેલાડી નથી, પરંતુ આત્મવિશ્વાસ, સંકલ્પ અને અવિરત મહેનતનું જીવંત ઉદાહરણ છે. તેની આ ગગનચુંબી ઉડાન દરેક યુવાનને પોતાના સપનાઓ પાછળ દોડવાની પ્રેરણા આપે છે.
પોતાના નામ ‘ફલક’ જેનો અર્થ આકાશ થાય છે. તેને સાર્થક કરતી આ દીકરી અત્યારે હોંગકોંગ સર કરીને આવી છે, પણ તેની નજર હવે વિશ્વ ફલક પર ભારતનો તિરંગો વધુ ઊંચે લહેરાવવા પર છે. સંકલ્પથી શિખર સુધી પહોંચવાની દૃઢ નિશ્ચય સાથે ફલક વસાવા આજે દેશની લાખો દીકરીઓ માટે પ્રેરણારૂપ બની ગઈ છે.
ટ્રેમ્પોલીન જીમ્નાસ્ટિક એ સામાન્ય જીમ્નાસ્ટિક કરતાં સાવ અલગ, અત્યંત રોમાંચક અને ઓલિમ્પિક સ્તરની ઓફિશિયલ રમત છે. આ રમતમાં ખેલાડીએ સ્પ્રિંગવાળા અને મજબૂત જાળીદાર બેડ (જેને ટ્રેમ્પોલીન કહેવાય છે) પર સતત ઊંચા કુદકા મારવાના હોય છે. ખેલાડી આ ટ્રેમ્પોલીનની મદદથી હવામાં ઊંચાઈ પર પહોંચે છે, હવામાં અધ્ધર હોય તે સેકન્ડો દરમિયાન ખેલાડીએ પોતાની ક્ષમતા, સંતુલન અને ચપળતાનો ઉપયોગ કરીને હવામાં જ પલટીઓ મારવી, શરીરને અલગ-અલગ એંગલ પર વાળવું અને અદભુત કરતબો બતાવવાના હોય છે.
આંતરરાષ્ટ્રીય સ્તરે જજ દ્વારા ખેલાડીના કુદકાની ઊંચાઈ, હવામાં કરાતા કરતબો અને લેન્ડિંગની ચોકસાઈ જોઈને ગુણ આપવામાં આવે છે. આ રમત આકરી મહેનત, અજોડ એકાગ્રતા અને લોખંડી મનોબળને કેન્દ્રમાં રાખે છે.
તસવીર :દીપક જગતાપ, રાજપીપળા
