‘લાગણીના સ્પંદનો’ સંતાન પ્રત્યેની થીજી ગયેલી સંવેદનાઓને પુનર્જીવિત કરતી એક સ્વરચિત લધુવાર્તા…- નિખિલ કિનારીવાળા, અમદાવાદ.

કલા સાહિત્ય ગુજરાત બિઝનેસ ભારત સમાચાર

🌾🥀🌾🥀🌾🥀🌾🥀🌾🥀🌾🥀🌾🥀🌾🥀

શીર્ષક :- ‘લાગણીના સ્પંદનો’

બરાબર ૧૭ વર્ષના વહાણા વાઈ ગયા હતા. આજે શિકાગો અમેરિકામાં આજના સમયની ભારતની પ્રખ્યાત સંગીત બેલડી ઋજુતા અને સચિનનો ભવ્ય સંગીત કાર્યક્રમ આયોજિત કરવામાં આવ્યો હતો. ઋજુતાના મનમાં હરખ હિલોળા લઇ રહ્યો હતો. અંતરની ઉર્મિઓ ઉભરાઈને બહાર આવવા મથી રહી હતી. કારણ આજે આટલા વર્ષો બાદ તેના માતા-પિતાને તે નજરે જોવાની હતી. શિકાગોમાં વસવાટ કરતા ઋજુતાના નાનપણના મિત્રની મદદથી તેના માતા-પિતાને માંડ સમજાવીને આજે આ કાર્યક્રમમાં બોલાવવામાં આવ્યા હતા. વારેવારે આવીને સ્ટેજ પરના બંધ પડદાની ફાટમાંથી ઋજુતા કુતુહલતાપૂર્વક નજર નાખી તેના માતા-પિતાની ઝલક મેળવવા કોશિશ કરતી. અનાયાસે જ ઋજુતા ભૂતકાળના સંસ્મરણોમાં સરી પડી.

આજથી આશરે ૧૭ વર્ષ પહેલાં ઋજુતાએ પરિવારની મરજી વિરુદ્ધ જઈને સચિન સાથે લગ્ન કરી પોતાનો સંસાર વસાવ્યો હતો. દેખાવે સુંદર અને નમણી ઋજુતા ચુસ્ત અને સંસ્કારી બ્રાહ્મણ કુટુંબમાંથી આવે. તેનું આખું કુટુંબ પહેલેથી જ સંગીતપ્રેમી હતું અને ઘરમાં સંગીતનું વાતાવરણ રહેતું. ઋજુતાએ તેમના કુટુંબનો સંગીતનો વારસો જાળવી રાખ્યો હતો. આગળ જતાં ઋજુતાએ પદ્ધતિસરનું સંગીતનું શિક્ષણ લીધું અને પોતે સંગીત વિશારદ થઈ. તેના માતા-પિતા કિશોરભાઈ અને રંજનબેનના આનંદનો પાર નહોતો. સમાજમાં અને મિત્રવર્તુળમાં ઋજુતાના ગર્વભેર વખાણ કરતા થાકતા નહીં. જોગાનુજોગ ઋજુતાની મુલાકાત સચિન સાથે થઈ. સચિન પણ સંગીત વિશારદ હતો. સચિન સામાન્ય કક્ષાના સંસ્કારી મહારાષ્ટ્રીયન કુટુંબમાંથી હતો. સમય જતાં બંનેના મનમાં એકબીજા માટે પ્રેમના અંકુર ફૂટ્યા. ઋજુતા અને સચિન બંને સંગીતના ક્ષેત્રમાં તેમની કારકિર્દી બનાવવા માટે દ્રઢનિશ્ચયી હતાં. તેઓની એકબીજાને સથવારે જીવનની આ સફર ખેડવાની મહેચ્છા હતી.

બંનેએ પોતપોતાના માતાપિતા પાસે લગ્નની ઈચ્છા વ્યક્ત કરી મંજૂરી માંગી. સચિનના કુટુંબે ઋજુતા અને સચિનના પ્રેમસંબંધને મંજૂરીની મહોર મારી દીધી. પરંતુ ઋજુતાના કુટુંબમાં પરિસ્થિતિ કંઈક જુદી જ હતી. ચુસ્ત અને સંકુચિત, જ્ઞાતિવાદની વિચારસરણી ધરાવતા પિતા કિશોરભાઈની આ સંબંધ માટે સ્પષ્ટ ના હતી. ઋજુતાની અસંખ્ય વિનવણી અને રંજનબેનની સમજાવટના પ્રયત્નો નિષ્ફળ રહ્યાં. કિશોરભાઈ તેમના નિર્ણયમાં અફર હતા અને તાબડતોબ ઋજુતા માટે તેમની જ્ઞાતીના એક સુશીલ છોકરા સાથે ઋજુતાનો સંબંધ નક્કી કરી તેના લગ્ન લીધાં. ઋજુતાની મૂંઝવણનો પાર નહોતો. તે માતા રંજનબેનની લાચારી પણ સમજતી હતી. છેવટે એક કઠોર પગલું ભરીને ઋજુતાએ સચિન સાથે લગ્ન કરી લીધા. લગ્ન પછી તો પપ્પા અમને સ્વીકારી જ લેશે એ આશા પણ ઠગારી નીવડી. આશીર્વાદની જગ્યાએ કિશોરભાઈએ ઋજુતાને કડવાં વેણ કહ્યાં, ‘આજથી તું અમારા માટે મરી પરવારી છે’ જે હંમેશ માટે ઋજુતાને દિલમાં ડંખતા રહ્યા.

સમય વીતતો ગયો. ઋજુતા અને સચિન સંગીતના ક્ષેત્રમાં અભૂતપૂર્વ નામના મેળવી સફળતાના શિખરો સર કરતા ગયા. આ સંગીત બેલડીનું નામ દેશ-વિદેશમાં માન ભેર લેવાવા લાગ્યું. ઋજુતાથી ઉંમરમાં આઠેક વર્ષ નાનો ભાઈ મનોજ ભણીને નોકરી અર્થે અમેરિકાના શિકાગોમાં સ્થિત થયો. છેલ્લા પાંચ વર્ષથી કિશોરભાઈ અને રંજનબેન પણ હવે પુત્ર મનોજ સાથે રહેવા માટે અમેરિકા અવારનવાર આવ-જા કરવા લાગ્યા. બંને પક્ષે આટલા વર્ષો પછી પણ લાગણીના સ્પંદનો જીવિત હતા. ઋજુતા તેના મિત્રોના માધ્યમથી તેના માતા-પિતા અને ભાઈની ખબર લેતી રહેતી. પરંતુ છેલ્લા ૧૭ વર્ષથી ઋજુતા, પિતા કિશોરભાઈના જક્કી વલણને કારણે સમગ્ર કુટુંબના સીધા સંપર્કથી કપાઈ ગઈ હતી. રંજનબેન પણ આ પરિસ્થિતિમાં લાચારી અનુભવી રહ્યા હતા.

આજે શિકાગોમાં વિશાળ ઓડિટોરીયમમાં સંગીત રસિકો વચ્ચે ઋજુતા અને સચિનનો કાર્યક્રમ થઈ રહ્યો છે. બહારથી સખત દેખાતા કિશોરભાઈ પણ આટલા વર્ષો બાદ હવે ધીરે-ધીરે અહંકારના પડળો છોડી કૂણા પડયા હતા. રંજનબેન તો ઋજુતાને જોવા અને બાથમાં લેવા તલસી રહ્યા હતા. ઋજુતાના નાનપણના મિત્રે આજની તક ઝડપી લઇ ઋજુતાના માતા પિતા અને ભાઈને કાર્યક્રમ જોવા ઓડિટોરિયમમાં લઈ આવવાનું નક્કી કર્યું. ઋજુતાએ કાર્યક્રમ શરૂ થતા પહેલાં જ તેમને એક નજરે જોઈને મનમાં ઠંડક મેળવી લીધી.

આખાય કાર્યક્રમ દરમ્યાન ઓડિટોરિયમ તાળીઓના ગડગડાટથી ગૂંજતુ રહ્યું. કિશોરભાઈ અને રંજનબેનના ચહેરા પર ઋજુતા અને સચિનને લઈને આજે એક વિશિષ્ટ પ્રકારનો ગર્વ દેખાઈ રહ્યો હતો. કાર્યક્રમ બાદ ઋજુતાનો મિત્ર તેમને સહુને સ્ટેજની પાછળ લઈ ગયો. ઋજુતાને જોતાં જ કિશોરભાઈ થોડા અંતરે ઊભા રહી ગયા પરંતુ ઋજુતા અને રંજનબેન બંનેની આંખોમાંથી અવિરત અશ્રુધારા ચાલુ હતી. ઋજુતા દોડીને રંજનબેનને ભેટી પડી અને પિતા કિશોરભાઈ તરફ નજર કરી માત્ર એટલું બોલી.’તમારું મારા હૃદયમાં એક વિશિષ્ટ પૂજનીય સ્થાન છે. તમારા ધિક્કારમાંથી પણ અમને હંમેશા આશિર્વાદ જ પ્રાપ્ત થયાં છે. આજે હું જે સ્થાન ઉપર છું તેનો પ્રથમ યશ મારા માતા-પિતાને જાય છે. મારી તમારા પ્રત્યેની લાગણીઓ ક્યારેય મરી નથી, લાગણીના સ્પંદનો થઈ અવારનવાર ઉપસતી જ રહે છે.’

સ્પષ્ટ દેખાઈ રહ્યું હતું કે, પિતા કિશોરભાઈની આંખો હર્ષના અશ્રુઓથી ઉભરાઈ રહી હતી અને તેઓ તેને ખાળવા નિરર્થક પ્રયત્ન કરી રહ્યા હતા. કશું જ બોલ્યા વગર આગળ વધી બે હાથ ફેલાવી ઋજુતાને છાતી સરખી ચાંપી લીધી. ત્યાં ઉપસ્થિત સહુએ આ મિલનને તાળીઓના ગડગડાટથી વધાવી લીધું. સચિનના ચહેરા પર પણ વર્ષોથી થંભી ગયેલું સ્મિત ઝલકી રહ્યું હતું.

– નિખિલ કિનારીવાળા, અમદાવાદ

TejGujarati