કોરોના વચ્ચે અમેરિકામાં H-1B, L-1 વિઝાના નિયમોમાં મોટી રાહત

આંતરરાષ્ટ્રીય ભારત સમાચાર

કોરોનાના નવા વેરિઅન્ટ ઓમિક્રોનના વધતા જતા કેસોને ધ્યાનમાં રાખીને, યુએસે ગુરુવારે વર્કિંગ વિઝા એચ-વનબી, એલ-વન અને ઓ-વનને વ્યક્તિગત ઇન્ટર્વ્યુમાંથી મુક્તિ આપી છે. સ્ટેટ ડિપાર્ટમેન્ટે એક પ્રેસ રિલીઝમાં કહ્યું કે કોરોનાના વધતા જતા કેસને ધ્યાનમાં રાખીને, સરકારે વિઝાધારકોને તેમના વિઝા રિન્યૂ કરતાં પહેલાં ઇન્ટર્વ્યુમાંથી મુક્તિ આપી છે. આ નિર્ણય બાદ હવે દુનિયાભરમાંથી અરજી કરનારા લોકો માટે રાહતના સમાચાર આવ્યા છે.
કોન્સ્યુલર અધિકારીઓને કામચલાઉ મંજૂરી આપવામાં આવી છે કે વ્યક્તિગત ઇન્ટર્વ્યુમાંથી રાહત આપે. જેમાં એચ-વનબી વિઝા, એચ-થ્રી વિઝા, એલ વિઝા, ઓ વિઝાનો સમાવેશ થાય છે. નિવેદનમાં કહેવામાં આવ્યું છે કે, ‘કોવિડ-૧૯ મહામારીને કારણે વિભાગની વિઝા પ્રોસેસિંગ ક્ષમતામાં ઘટાડો જોવા મળ્યો છે. અમે અત્યારે આ કામચલાઉ પગલાં લઈ રહ્યા છીએ. જેથી વિઝા માટે રાહ જોવાનો સમય સુરક્ષિત અને અસરકારક રીતે ઘટાડી શકાય. આ સમય દરમિયાન અમે રાષ્ટ્રીય સુરક્ષાને અમારી પ્રાથમિકતા તરીકે રાખીશું.
હવે લગભગ એક ડઝન વિઝા શ્રેણીઓ માટે વ્યક્તિગત ઇન્ટર્વ્યુમાંથી અસ્થાયી રૂપે મુક્તિ આપવામાં આવી છે. આમાં નોન-ઇમિગ્રેશન વિઝા (એચ-વન બી વિઝા), વિદ્યાર્થીઓ માટેના વિઝા, અસ્થાયી કૃષિ અને બિન-ખેતી કામદારો, વિદ્યાર્થી વિનિમય કાર્યક્રમો, રમતવીરો, કલાકારો અને મનોરંજન કરનારાઓ જેવી શ્રેણીઓથી સંબંધિત વિઝાનો સમાવેશ થાય છે. માર્ચ ૨૦૨૦માં, યુએસ સ્ટેટ ડિપાર્ટમેન્ટે કોરોના વાઈરસ ફાટી નીકળવાના કારણે વિશ્વના મોટાભાગના દેશોમાં તમામ નિયમિત વિઝા સેવાઓ સ્થગિત કરી દીધી હતી. મર્યાદિત ક્ષમતા અને અગ્રતાના ધોરણે સેવાઓ પુનઃસ્થાપિત કરવામાં આવી હોવા છતાં, કેટલાક વિઝા એપોઇન્ટમેન્ટ માટે લોકોએ મહિનાઓ સુધી રાહ જોવી પડી હતી.
સૌથી વધુ ચર્ચિત એચ-વન બી વિઝાને ઇન્ટર્વ્યુમાં મુક્તિ આપવામાં આવી છે. તે નોન-ઇમિગ્રેશન વિઝા છે, જે યુએસ કંપનીઓને વિદેશી કામદારોને રોજગારી આપવાની મંજૂરી આપે છે. આ ટેક્નોલોજીને કારણે કંપનીઓ ભારત અને ચીન જેવા દેશોમાંથી દર વર્ષે હજારો લોકોને નોકરી પર રાખે છે. ભારતીય આઇટી પ્રોફેશનલ્સમાં એચ-વન બી વિઝા સૌથી વધુ માંગવામાં આવે છે.

TejGujarati