ગાયને શું થાય છે? પૂછો તો ખરા!

ગુજરાત સમાચાર

ગાયને દોરો ત્યાં જાય અને ક્યારેય સામી ના થાય એ વાત આપણને માણસોને ફાવતી આવે છે પ્રાણીઓ તથા માણસોની લાઈફ, લાઈફ સ્ટાઈલ, બુદ્ધિ, શક્તિઓ બધું જ એકબીજાથી સાવ ભિન્ન હોય છે. આ પૃથ્વી જેટલી આપણી છે એટલી જ પ્રાણીઓની પણ છે. એટલે જીઓ અને જીને દો ના સિદ્ધાંત પર બંનેએ એકબીજાની લાઈફમાં ક્યારેય દખલંદાજી ના કરવાની હોય. હવે બુદ્ધિ વગરના ગણાતા પ્રાણીઓ તો આ વાત બરોબર સમજતા હોય છે અને ક્યારેય આપણાં કામમાં માથું મારતા નથી, પરંતુ આપણે તો આપણે છીએ. દખલગીરી અને દોઢડહાપણ કર્યા વગર આપણને કેમ ચાલે? આવી મગજમારીઓ કરવામાં આપણે મનુષ્યજગતથી ધરાતા નથી એટલે પ્રાણીજગતમાં પણ ચંચૂપાત કરે રાખીએ છીએ. પ્રાણીઓ આપણું વર્ગીકરણ કરવાની જફામાં ક્યારેય પડતા નથી. પણ આપણે પ્રાણીઓનું વર્ગીકરણ કરીને એમને અલગ અલગ વિભાગમાં બેસાડી દઈએ છીએ. એ પ્રમાણે ગાયને આપણે ડોમેસ્ટિક એનિમલના વિભાગમાં ગણતા હોઈએ છીએ અને ડોમેસ્ટિક પ્રાણીઓ તથા ડોમેસ્ટિક સ્ત્રીઓ પ્રત્યે આપણી દંભી કરુણા તો વર્ષોથી જાણીતી છે. ગાયને દોરો ત્યાં જાય અને ક્યારેય સામી ના થાય એ વાત આપણને માણસોને ફાવતી આવે છે. બિચારીનું ભારે શરીર પણ નામનું જ હોય છે અને એના શિંગડા પૂંઠાની તલવારવાળી ઈંપ્રેશન ધરાવે છે. આપણે ટૅક્નૉલૉજીના જોરે આપણી જાતને જાણકાર માની બેઠા છીએ, પણ ગાયની ભાષા અને એનું મનોજગત આપણી સમજની બહાર છે. એટલે એના ચિત્તમાં આપણે માટે શું ચાલતું હશે એ જાણવું શક્ય નથી, પરંતુ માણસો માટે ગાયને માન-વાન જેવું કશું હશે નહિ એ વાત તો ચોક્કસ છે. એ આપણે માટે શું વિચારતી હશે. ઘણાં લોકોની ક્યાંય ના ચાલે એવી દીકરી કોઈને વળગાડવા પેરેન્ટ્સ એને ગાય સાથે સરખાવતા હોય છે. એ વાત પર ગાયને દુઃખ સાથે હસવું પણ આવતું હશે. માતેલા સાંઢ જેવી દીકરીને ગાય જેવી ગણાવીને મા-બાપ સામે વાળાને છેતરતા હોય છે. ગાયનો ગોવાળ બનીને જીવવાના ઓરતા લઈને આવેલો જમાઈ સાંઢનો માર ખાઈને તાર તાર બની ગયેલા લાલ કાપડાં જેવો બનીને રહી જાય. વર્ષોથી ગાયના નરમ સ્વભાવને વટાવી ખાવા માટે અને ગાયની ઈંપ્રેશન બગાડવા માટે માણસજાત પર બદનક્ષીનો દાવો માંડવાનું એને મન તો જરૂર થઈ આવતું હશે. તો રસ્તા ઉપર ગમે ત્યાં બેસી જવા માટે ગાયને દંડાના માર સાથે કેટલું હટ-ફૂટ સહન કરવું પડતું હોય છે. એ વાત પર ગાય કેટલી દુઃખી થતી હશે અને વિચારતી હશે કે માણસો મારા બેટા નો પાર્કિંગના બોર્ડની સામે જ ગાડીઓ પાર્ક કરી કરીને ચાલવા માંડતા હોય છે. નો પાર્કિંગ આગળ જઈને પાર્કના થઈ જવાય એટલી સમજતો એમને પણ પડે છે. માણસો પોતે તો ટ્રાફિકના નિયમો પાળતા નથી અને અમે જો ભૂલથી રોડ ઉપર આવી ચડીએ તો ઈશ્યુ બનાવી દે છે. માણસોમાં અમને રાખી કે સાચવી શકવાના વેતા ના હોય તો અમને પાળતા શા માટે હશે. અમને રસ્તા પર છોડી મૂકે તો અમે રસ્તા પર જ રહેવાના ને. માણસ તો છીએ નહિ કે કોઈ બીજાના ઘરમાં ઘૂસી જઈએ, વળી માણસો માટે પે એન્ડ યુઝની સગવડ છે છતાં એ લોકો સ્વચ્છ નથી રાખી શકતા. આપણે માટે પે એન્ડ યુઝને બદલે યુઝ એન્ડ કીલની પ્રથા રાખવામાં આવી છે. અમારું માંસ હોય, દૂધ હોય કે છાણ હોય જે મળ્યું એ બધું વાપરે છે. આ માણસોની સરળતા છે કે ગ્રીડ? વળી ઘણાં બકાસુરો દિવસનો પોણો ભાગ ખાવામાં કાઢતા હોય છે અને એને વાગોળવાની ક્રિયા સાથે જોડી નાખે છે. અમે તો ખાધેલું જ પાછું ચાવીને ડાયજેસ્ટ કરતા હોઈએ છીએ. વાગોળવા અને ચગળવા વચ્ચેનો ફરક માણસો સમજતા નહિ હોય. અમારા શરીરના ફનાફાતિયા કરીને દૂધની ગંગા વહેવડાવવામાં પણ ક્યાં પાછુ વળીને જુએ છે.
ગાયના મગજમાં આવું ઘણું ઘણું ચાલતું જ હશે. અધૂરામાં પૂરું પ્લાસ્ટિક પણ બેન કરી નાખ્યું છે. ગાય ખાય તો શું ખાય? એક જમાનામાં તો ગાયના નામની એક રોટલી પણ બનતી હતી. હવે તો જો પોતાના ફાયદા માટે કોઈ જ્યોતિષે ટૂચકો બતાડ્યો હોય તો જ ગાયને ખાવાનું આપવામાં આવે. આમ તો દીકરીને ગાય બંનેને નરમ ગણીને દોરવામાં આવતી હતી. દીકરીઓ તો ઘણાં વર્ષોથી પોતાની શક્તિને ઓળખતી આવી છે. હવે જમાનો જેમ બદલાતો જાય છે એ પ્રમાણે ગાયોને જે દિવસે બહોત હો ગયા વાળું સેચ્યુરેશન આવશે એ દિવસે એના અણીદાર શિંગડા પર પનીર ટિક્કાની જેમ આપણે લટકતા હોઈશું. આજ સુધીના બધા અત્યાચારોને યાદ કરીને જો એ શિંગડા ઉગામશે.કદાચ તો જ સાન ઠેકાણે આવશે. ગાય માથું ડોલાવીને એવું કહેવા માંગે છે કે મારી પૂજા ના કરતા પણ શાંતિથી જીવવા દો.
પ્રાણી હિતમાં જારી.

રિપોર્ટર :- રશ્મિન ગાંધી

TejGujarati
  •  
  •  
  •  
  •  
  •  
  •  

Leave a Reply