*સંતોષ અને શોર્ટકટ* – પૂજન મજમુદાર.

કલા સાહિત્ય ગુજરાત બિઝનેસ ભારત સમાચાર

પહેલાં દુરદર્શન પર ચિત્રહાર, અઠવાડિયે બે વાર આવતું

ભણતરની સાથે મનોરંજન પણ આ જ રીતે ફાવતું

રવિવારની ફિલ્મ વખતે લાઈટ જાય તો ખાવાનુંય ન ભાવતું

આજે સેંકડો ચેનલ્સ ને હજારો સીરીયલ્સ છે

પણ આંગળીઓ રીમોટ પર રમ્યા કરે છે

ચિત્ત ક્યાંય ચોટતું નથી ને મન ચોતરફ ભમ્યા કરે છે

એક સાથે ને એક જ સમયે સિત્તેર ફિલ્મો ના ઓપ્શન હોય છે,

પણ મનને કૈક બીજું જ ગમ્યા કરે છે

માણસ જાણે ધીરજ સાવ ખોઈ બેઠો છે

સમૂહમાં હોય તોય એકલતામાં રોઈ બેઠો છે

પાસે હોય પોતાનું ને લાગે અજાણ્યો કોઈ બેઠો છે

એ ગામડામાં હોય ને નગરને વિચારે છે

એ સેન્ડવીચ ખાય પણ બર્ગરને વિચારે છે

એ ફ્લેટમાં રહે પણ મોટા ઘરને વિચારે છે

એ રોજ શેરબજારમાં રોકડી શોધે છે

એ મધરાતે સપનાંમાં નોટોની થોકડી શોધે છે

એને નગર,બર્ગર,મોટું ઘર સઘળુંય મળી શકે,

પણ એ તો

મેહનતનો પર્યાય શોધે છે

એને કોણ સમજાવે કે દોસ્ત,

મેહનતનો પર્યાય આ જગતમાં છે જ નહીં

ફૂલો ઉગાડવા કાંટાનો ઘાવ, રોજીંદી ઘટમાળમાં

મગજનો તાવ અને રોજબરોજ દરેક ચીજનો વધતો જતો ભાવ

પણ સહેવો પડે છે,

ને એ પણ મેહનત ના શોર્ટકટ વિના,

ને પછી સાંપડે છે સપનાનું નગર, ડબલ ચીઝ વાળું બર્ગર અને

જમીનને અડીને બનેલું મોટું ઘર.

પૂજન મજમુદાર

TejGujarati